ISUA – KAWNG

JOHANA 14:6
Isuan a hnênah, “Keimah hi kawng leh thutak leh nunna ka ni; keimaha kal lo chu tu mah Pa hnênah an thleng ngai lo.

Isaian, “… Hei hi kawng a nih hi, tah hian kal rawh u,” (30:21) a tih leh “Chutah chuan lamlian a awm ang a, chu chu ‘Thianghlimna Kawng’ an ti ang; mi bawlhhlawhte chu chutah chuan an kal lo vang a, amaherawhchu, heng mite tân hian a ni zâwk ang… (35:8)” tia a lo ziah hian Lal Isua hi kawng dik, zawh tûr dik tak a nihzia a lo sawi lâwk niin a lang.

Vânram luh kan tum dân hi sakhaw ṭhenkhat vuantute chuan khaw pakhata luhna hrang hrang awm, luh tumna erawh thuhmun angin an sawi ṭhin a. Kan Lal Isua hian amah chu ‘kawng’ a intih bâkah ‘keimaha kal lo chu tu mah Pa hnênah an thleng ngai lo’ tia min hrilh avang hian sakhaw dang rin dân hi chu keini Kristiante chuan, Vânram panna kawng ni theiah kan ngai lo a ni. Eng zirtîrna pawh lo chhuak se, Lal Isua chauh hi kawng awm chhun a ni tih kan hriat reng a pawimawh a ni.