ISUA – THUTAK

JOHANA 14:6
Isuan a hnênah, “Keimah hi kawng leh thutak leh nunna ka ni; keimaha kal lo chu tu mah Pa hnênah an thleng ngai lo.

Lal Isuan a nihna pawimawh tak a sawi, kan zir leh tûr pakhat chu ‘thutak’ a nihna thu hi a ni. Sam phuahtu chuan, “Lalpa kalkawng zawng zawngte chu ngilneihna leh thutak vek a ni,” (Sam 25:10) tite leh, “Aw Lalpa, thutak Pathian, nangin mi tlan ta,” (Sam 31:5) titein a lo sawi a. Hengte hian Lal Isua ‘thutak’ a nih tûrzia thu a târ lang chiang hle a ni.

‘Thutak’ chu rilru leh thluak finna maia kan hriat ni lo, kan thinlung chhûngril ber pawhin ni ngeia a pawm, a taka kan lan chhuahtîr ngam hi a ni a. Lal Isua ‘thutak’ a nihna pawh hi thu dik lo sawi ngai lo, rinawm lo ngai lo, rintlâk lova awm ngai lo, a lem emaw a ang ve deuh emaw, ni ve deuh riai ruai emaw ni lo va, a tak hlang hlak leh dik tluan chhuak zaka a sawi a taka lantîr ṭhintu a nihna kha a ni. Ni tina kan nun dânah hian Lal Isua ‘thutak’ a nihna hi kan lantîr vein kan inhria em le?