PATHIAN AWMZIA TILANGTU THLARAU THIANGHLIM

TIRHKOHTE 2:1-4
Tin, Pentikos ni a lo thlenin, an zain hmun khatah an awm khâwm vek a. Tin, thâwklehkhatan vân ata ri, thlipui tleh angin a lo thleng ta phut a; tin, chu chuan an ṭhutna in chu a tikhat ta vek a. Tin, leite amaha insem darhin, mei angin an hnênah a lo inlâr ta a. Tin, an chungah a chuang ṭheuh va, an zain Thlarau Thianghlimin an khat ta vek a, Thlarauvin a ṭawngtîr ang zêlin ṭawng dangin an lo ṭawng ta a.

Lal Isua vâna a lâwn aṭanga chhiara a ni sawmngana-ah Thlarau Thianghlim a lo thleng a. Ringtu chak lo takte pawh tihchakin an awm a, dâwihzepte tihhuaisena awmin thiltithei lote thiltitheia siamin an lo awm ta a. Thilmak tam tak an tih theih phah ta a ni.

Vawiin thlengin Pathian ringtute chu Thlarau Thianghlimin a awmpui a. Thiltihtheihna nasa taka a thuam pawh hriat tûr tam tak an awm. “Thlarau ngei chuan, keimahni thlarau nên Pathian fate kan ni tih min hriattîr ṭhîn,” tiin Paulan min hrilh a. Thlarau Thianghlim awmpuina miin a chan loh chuan Pathian hi a awm ngei a ni tih hriatna amahah a awm thei lo. A fate chuan a awmpuina an tem a, hmuh theih loh lamah inpâwlna hlimawm tak an chang ṭhîn a ni.