PILATAN ISUA A HNAWL

MARKA 15:14-15
Tin, Pilata chuan an hnênah, “Engah maw? Eng nge a tihsual ni?” a ti a. Nimahsela, anniho chu, “Krawsah khêng bet rawh,” tiin an au chiam a. Tichuan, Pilata chuan mipuiho chu tihlungawi a duh a, Barabba chu a chhuahsak ta a; tin, Isua chu a vuak zawhin krawsa khen beh tûrin a pe ta a.

Pilata hnênah Judate an lo kal a, Isua an hêk a. Pilata chuan mi fel thiamlohna nei lo thiamloh chantîr a dik lo tih chu a chhia leh ṭha hriatnain a hrilh. A nupui lahin rorêlna ṭhuthlenga a ṭhut laiin, ‘Kha mi fel chungah khân engmah ti suh’ tiin a lo chah ve bawk a. Isua chu îtsikna avângin an mantîr tih a hria a, chhuah zalen pawh a duh a ni.

Judaten, “Kaisara ṭhian i ni lo vang,” an tih avângin a nihna chân a hlau a, Kaisara leh mipui tih lungawi a duh avângin Isua a hnâwl ta a ni (Mt. 27:24). Kut sil hian thisenah mawh an phur lo tih entîr nan Judaten an lo hman ṭhin a ni (Deut. 21:6-7).

Ka duhthlanna hi ka pe,
I taah chantîr ang che.
Thinlung i hnênah ka hlân,
I chênna atân nei la.