MIPAT HMEICHHIATNA

1 KORINTH 7:1-2
Tin, in thil ziak thute kha chu: mipa tân hmeichhe khawih loh a ṭha a ni. Nimahsela, inngaihnate a awm ṭhin avângin mipain nupui bîk nei ṭheuh sela, hmeichhia pawhin pasal bîk nei ṭheuh rawh se.

Sâp thufingin ‘Tihdam aiin invên a ṭha zâwk’ a tih hi vawn reng a ṭha. Sex hman sualna laka invawng thianghlim tu mah inchhîr an awm ngai lo vang a, he sualnaa inhmang bawlhhlawh tu mah inchhîr lo an awm bawk lo vang.

Mipa leh hmeichhia hi Pathianin inhîp tawn theiin min siam a. Inhnaiha suala tlu mai thei, inhlata tlu lo thei dinhmuna ding kan nih avângin inhnaih loh theih hi sual laka invênna a ni. Lehkhabu ṭha lo leh film ṭha lo lakah invên a pawimawh hlê bawk. Tûnlaia pâwngsual lo tam ta pawh hi hêng thilin a hrin niin a lang. Josefa anga Pathian chunga thiltih sualna a ni tih hriat a, kan tlânchhiatsan ngam a pawimawh. Tirhkoh Paulan, ”Thlarauvah chuan awm rawh u; tichuan, tisa châkna chu in zâwm dâwn lo nia,” a tih hi i hre reng bawk ang u (Gal. 5:16).