HAW RAWH, LALPAN A NGAIDAM DUH CHE

— Joseph Bawlte
Rahsiveng, Lunglei

LUKA 15:17-19
“Tin, a inhriat chhuah veleh, ‘Ka pa hnêna inhlawhfate chaw ei sên lohva nei an tam vei nên, kei lah chu hetah rilṭâmin ka thi dâwn si a! Ka tho vang a, ka pa hnênah ka kal ang a, a hnênah, “Ka pa, vâna mi chungah leh nangma mit hmuhin thil ka tisual e; i fapaa vuah tlâk ka ni ta lo ve; i hnêna inhlawhfa pakhat angin mi siam ve rawh,” ka ti ang,’ a ti a.

Kan Bible a ‘Chanchin Ṭha’ ziak pali zînga pathumna Luka ziak a bung 15-na kan en chuan thil bo pathum Lal Isuan tehkhin thu hmanga a sawi kan hmu a, chûng pathumte zînga sawi hlawh ber mai ‘Fapa tlân bo’ hian kan tûnlai nun hi a tichiang fuin a lang.

Fapa tlân bovin a pa in chhuahsan a, khaw lam hla takah a kal bo ang hian keini pawh hi Pathian hnên ata hla taka kal bovin hêng khawvêl thil tam takte hmang hian kan intibawlhhlawh zo ta. Lalremruata hlain,

“Haw rawh, aw haw rawh,
Lalpan a ngaidam duh che.
I sualna chu engtiang pawh ni se
Haw rawh, a silfai duh che,”

a tih ang hian eng ang pawhin khawvêl thil hmangin lo intibawlhhlawh tawh pawh ni ila, Lalpa hnêna kan haw chuan Lalpa hian min silfai hi a duh tak meuh a ni.

Billy Graham-a chuan, “Setana min bumna chu thil sual kan tih hmain, ‘A ho lutuk, tuman an hre ,’ a ti a. Sual a kan tlûk hnuah beisei tûr awm tawh lovin min ngaihtîr ṭhîn,” a ti a ni. He sual Setana min bumna, beisei tûr awm tawh lova min ngaihtîrna hi dâwt a nihzia kan târlang dâwn a ni.

Kum 7 vêl kan nih lai hian ṭhiante nêna balu leh leivûng a chên hi kan hrât thei êm êm a, tlâi kan han haw hian kan nu leh pate hian kan balhzia an hriat avângin min bualfai vat ṭhîn. Faisain tumah kan haw lo, kan balh ang angin kan haw a, kan bâlte chu kan nu leh paten min tihfaisak a ni. Chutiang chiah chuan Pathian hian a hnêna haw tûr hian faisa tûrin min phût lo, kan balhna leh bawlhhlawhna ang ang a haw a, min lo silfai a duh a ni. Hei hi beisei tûr la awm chu a ni.

Fapa tlânbo haw, a pain puan ṭha ber sintîr a, a kutah zungbun buntîr a, a kephahah pheikhawk a buntîr a, a thuam mawi ang khân keini bawlhhlawh tawh te hi Lalpa hian a fapa thisen a min silfai a, a thlarau thianghlima min thuam mawi hi a duh takzet a ni.

Pathianin Israel fate hnêna, “Hnungtawlh hmang Israel, lo kîr rawh. Thinrim hmêl puin ka en lo vang che u, Zahngai thei tak ka ni si a,” a tih ang khân keini hi Lalpa hian a hnêna haw leh tûrin min duh takzet a ni (Jeremia 3:12).

JEREMIA 3:14
Aw hnungtawlh hmang fate u, lo kîr rawh u,” tih hi Lalpa thuchhuak a ni.