GOOD FRIDAY ISSUE 1-NA

— Chhantea (Oriela patea)
East Lungdar

Isua’n Kross lêra thu pasarih a sawi te:-

Chanchin Ṭha bu 4 ten an sawi aṭanga lâkkhâwm te.

1. Eloi, eloi, lama sabakthani? (Mat. 27:46; Mk. 15:34). Mithiam te chuan hei hi Aramaik ṭawng a ni an ti. A awmzia chu, ‘Ka Pathian, Ka Pathian engah nge mi kalsan?’ tihna a ni a. Sam 21-na ami lâkchhuah ni âwm tak a ni.

Ni e. Pathian leh mihring nih kawp, nang leh kei anga lungngai thei. Nâ leh hrehawm tinrêng tuara hre ve thei, amah zuitu leh a laichînte pawhin an hnaih ngam loh khawpa tuar nâ. Rom sawrkâr dânah pawh leiah pawh thi tlâk lova an ngaih khân… ama sual leh tihsual ni miah lo, a siamtu biak aia thilsiam be tu mihringte, siamtuin a hmangaih êm sî avânga chûng bawhchhetu te tlan tûra a tuarnaah khân mihring lamah chuan lainattu leh hmangaihtu rêng a nei si lo.

Kalsana awm nih chu a natzia hi sawifiah a har lutuk. Kan nupui/pasal, bialnu/bialpa ten min rinawm loh san a, mi dang laka min kalsan pawhin nâ kan ti a. Tuarthiam har kan ti a, kan thinlung hi a rûm tlawk tlawk ṭhin. A ni, kan Isua meuh chuan hmangaihte kalsan mai nilovin hmangaihte amah kalsantu ten nun an neihna atân a nun hlan a ngai si a. Chu aia na chu a awm dawn êm ni?

Lalpa’n a thu malsâwm rawh se.