PHÛMIN A AWM

JOHANA 19:40,42
Tin, Isua ruang chu an la a, Juda-te inphûm dân angin englo rimtuite nên chuan puan zai sînin an tuam a. Tin, Juda-te Inrinni a nih avângin, thlân chu an kiang lawk a ni si a, chutah chuan Isua chu an zalh ta a.

Isua chu kan sualte avângin a thi a, phûmin a awm a. Josefa, Arimathai khuaa miin Pilata hnênah a ruang a dîl a, a thi chiang tawh tih a hriat hnuin a pe a, an khenbehna hmunah chuan huan pakhat, tu mah la zalh ngai lohna thlân thar pakhat Josefa ta a awm. A ruang chu puanzâi sînin an tuam a, a kârah rimtui tam tak Nikodema rawn ken chu dahin, lung ker kuakah chuan an zalh a. Thlân kawngkaah chuan lung lian tak an lum a. Khawvêlin Isua tâwpna tûrah an ngaih laiin ni thum nia kaih thawh a ni.

Nang leh kei hi Isua thihna a kan thih ve a, phûm kan nih hi kan thawhlehna kawngka a ni. Kan mihring mihrinna hi khenbeha, phûm bo a ngai. Kan thih loh hian kan nunah hnawk tam tak a siam. A thihnaa thi tûr leh phûm tûrin i inpe phal ang u.

Min entîr rawh an zalhna che,
Ṭapa an vuina che;
Puan vâr sin vântirhkohhovin,
I ruang an vênna kha.

LALPA, mahni inkhengbet tûrin min pui ang che.