GOOD FRIDAY THUCHAH

— Rev. K. Lianmunga

Thupui: Barabba nge Isua?
Chhiar tûr: Matt. 27:15-23

Pathian hruaina-in Kohhran hunpui pawimawh tak Good Friday chu kan lo thleng ta reng mai. Chhiartute in zavaiin kan Lalpa Isua Krista hmingin Good Friday chibai ka bûk a che u. Kumin chu Covid-19 hrilêng avângin kum danga kohhranhoten a huhova Biak Ina kan hman ṭhin angin kan hmang thei lova, a va han pawi tak em!! Nimahsela heng hunpui te hi Biak Inah kan hmang a ni emaw, mahni in ṭheuhah kan hmang a ni emaw, a pawimawh ber chu kan thinlung taka Good Friday dik tak a lo thlen hi a pawimawh ber chu a ni. Khawvêl lungkhamna emaw, ei leh bâr ngaihtuahna emaw, hripui hlauhna emaw dah ṭha in thlîr ninawm loh Lal Isua lam hi i thlir phawt mai ang u.

Lal Isuan rawng a bâwl tirh phat aṭangin phiartu a nei nghal a. Chung amah phiartute chu pâwl lian tak tak pathum Pharisai te, Sadukai te leh Heroda pâwla mite an ni. Hengho hian an thil tum lian ber chu Lal Isua dah bo a ni. Lal Isua chu Kraws-a an khenbeh hmain Judate rorêlna Sanhedrin (tûnlaia Israel rama an Supreme Court) hmaah, Pilata hmaah, Heroda hmaah, Rom rorêlna hmaah leh Pilata hmaah a ding nawn a ni. Hun reilote chhûngin rorêlna vawi 4 a hmachhawn hman a ni.

A tâwpah ramawptu Pilata hmaah a ding nawn leh a, mahse Pilata chuan Isua sualna a hmuh loh thu a sawi a. Juda mipuite hnenah ‘He mi hi mite hel tûra fuihah in rawn puh a, in hma ngeiah ka chhuahchhal a, in hêkna thuah thil pawi engmah a khawih ka hre lo. Heroda pawhin a hmu hek lo, ka hnênah a rawn tîr kîr leh ta mai a nih hi. Ngai rawh u, thihna khawp meuh engmah tih a nei lova, tichuan, ka zilh hlek ang a, ka chhuah mai dâwn a ni (Lk. 23:14-17)’ a ti a.

Mipuite erawh chuan chutiang ringawt chu ni theiin an hre lo, Isua chu Kraws-a khengbet tûrin an nawr ta chiam a. Chutah Pilata chuan Kalhlen Kût laia mi tâng pakhat chhuah theihna dân chu remchângah hman a tum a. Isua chu chhuah mai a duh a, mahse mipuiin an remti thei lo. Hetih lai hian tânin-a mitâng zîngah Barabba an tih hi a awm a, a ni hi khualzinte rawk ṭhin suamhmang râwng tak leh Rom sorkar dodal pâwl zînga mi a ni. Pilatan ‘Tu nge chhuahsak che u ila in duh Barabba nge Isua Krista an tiha hi? (Mat. 27:17)‘ tiin zawhna a siam ta a. Chutianga mipuite duhthlanna nghâka rorêlna ṭhutphaha a ṭhut laiin a nupui chuan ‘Kha mifel tak chungah khan engmah ti suh, vawiinah hian amah avângin mumangah thil tam tak ka tuar a ni (Mat 27:19)’ tiin a rawn chah a.

Pilata hian a nupui thurâwn zâwm ngat se chuan khawvêl chanchin hi a danglam dâwrh ngei ang le!! Mahse a zawm thei ngang si lo. ‘Tu zâwk nge chhuahsak che u ila in duh?’ a ti leh a, mipuite chuan Barabba an ti a, nasa leh zualin an nawr leh a, Pilatan engmah tih theih a nei ta lo. ‘Tui a la a, a kut a sil a, he mifel thisenah hian ka hul e, nangnin in tih tihin ti rawh u (Mat 27:24)‘ a ti a. Barabba chu a chhuah a, Isua erawh chu sipaite a vuak tîr a, Kraws-a khenbeh tûrin an kutah a pe ta a ni.

Vawiinah Good Friday a lo thlen hian mifel sualna nei lo, nang leh kei hian nun kan neih nâna Lal Isua chunga thu tlûkna râpthlak tak leh mak tak hi i ngaihtuah thar teh ang u, Barabba nge Isua Krista? Suamhmang ni lo mah ila, tualthattu ni lo mah ila, misual kan nih leh mifel lo, mi bawlhhlawh kan nihzia hre thar leh tûrin Kraws-a kan tâna Lal Isua tuarna hi i hmu thar leh ang u.

Mipuite hmaah Isua chu chhawpin a awm a, Barabba nge i duh Lal Isua tih hi he Good Friday-ah hian bûkin a awm e. Isua a hnâwl avânga chatuan hrehmuna kal tûr ramawptu Pilata kha thiamchan nân a kut sil mahsela Isua Krawsa khenbeh tûra a pek tho tho avâng khân a nun inchhîr leh rilru na lutuk kha chatuan pawhin a fai maw! chatuan pawhin a fai maw! tiin a au vawn vawn a ni tih thawnthuah an ziak a ni.

Chutih lai chuan misual mah nise duhthlanna dik hmangtu a dinglama khaikân ve bawk a khân ‘Isu i ram i thlen hunin mi hre reng ang che (Lk 23: 42)‘ a ti a. Paradis-ah Lal Isua hnênah a châwl ta. Khawvêla kan khualzin kawng hi eng chen nge kan zawh dâwn kan hre lo. Kan hring nunah Lal Isua thlan hi kan lo dam rei dâwn a nih pawhin kan nun min hruaitu atân a tâwk a. He khawvêl kan lo chhuahsan hma a nih pawhin thihna lui kama zaia a hming kan fak theihna tûrin Lal Isua hi a chak tâwk a, thihna hnehtu a a ni e.

Ka rawn theihnghilh lawng che ka Lal Isu,
Kalvari lam ka lo hawi leh nâng e;
Ka tân i tuarna ka thinlung chhûngah,
ka hnukchah thlengin ka hre reng ang che’ tiin i inhlân thar ang u.

Lalpan a thu malsâwm rawh se. Amen.