KRAWS LERA ISUA THUSAWI 2-NA

LUKA 23:43
“Tihtakmeuhvin ka hrilh a che, vawiinah hian ka hnênah Paradis-ah i awm ve ang,” a ti a.

‘Paradis’ tih hi Persia ṭawng aṭanga lâk a ni a, ‘huan mawi tak’ emaw, ‘hmun mawi leh nuam tak’ emaw sawina a ni. Isua an khenbeh rual hian a ding lamah leh a vei lamah mi sual an khengbet ve ve a. Pakhat zâwk chuan Isua a chhuahchhal a.

A chhuahchhâltu chu a sîr lehlama mi chuan hauvin, Isuan sualna a neih ve loh thu leh anni chu an sual man chauh hmu an nih thu a sawi a. “Isu, i ram i thlen hunah mi hre reng ang che,” a ti a. Isuan, “Vawiinah ka hnenah Paradis-ah i awm ve ang,” tiin a chhâng a ni. A lawmawm duh hlê awm e.

Amah beiseia pantute tumah a hnar ngai lo. Mahni sualna hmu chiang a, tlûkluhna tûr dik taka tlulûtte chu an hun tâwpah pawh Lalpan a ngaidam duh ṭhin. Mi sual ber tân pawha hahchawlhna nuam chu Lal Isua hi a ni.