KRAWS LERA ISUA THUSAWI 7-NA
LUKA 23:46
Tin, Isua aw ring takin a au va, “Ka Pa, i kutah ka thlarau ka kawltîr e,” a ti a. Tin, chu chu a tih zawhin a thlarau a thlah ta a.
He thu hi kraws chunga Lal Isua thusawi hnuhnung ber a ni. Juda-hote chuan an fate an muttîr dâwnah, “Ka thlarau i kutah ka kawltîr e,” tiin Pathian hnêna ṭawngṭai dân tûr an zirtîr ṭhin.
A naupan laia a nu zirtîrna hre rengin, “Ka Pa, i kutah ka thlarau ka kawltîr e,” tiin a sawi a ni ngei ang. An nute malchunga nausên thlamuang taka an muhil siai siai ang hian, hnehna hlado a chham zawhah a Pa hnêna inkawl tîrin thawhlehna ropui nghâkin Isua hi a muhil ta siai siai a ni.
Pa Pathian ṭângchhûng hi tawrhna tâwpah pawh kan tlûkluhna tûr a ni. Damlo te, tar chak lo te leh tute pawhin khawvêla kan zin kawng kan zawh tâwp thut thei reng a, Pathian hnêna ni tin kan tlûkluh a pawimawh êm êm a ni.
