ADAMA LEH KRISTA

1 KORINTH 15:22
Adama-ah chuan mi zawng zawng an thi ṭhîn ang hian, Krista-ah chuan mi zawng zawng tihnunin an awm bawk ang.

Adama chu mihring hmasa ber ni tûra Pathianin vaivut ațanga a siam a ni a; a ni ruknia amah anpuia a siam a ni. Nunna neia a siam dangte aia a danglam bîkna chu thlarau a nei tlat hi a ni a. Thil siam dangte chunga thuneihna pêk a ni bawk. Adama chu mihring thlahtu bul a nih avangin mihring zawng zawng aiawhtu a ni bawk. Pathian dân a bawhchhiat avangin mi zawng zawng thihna a thlen a, amah pawh kum 930 a nihin a thi.

Thuthlung Tharah chuan Paulan awmze nei takin Adama chungchâng hi a sawi a; Krista nên a khaikhin a, Krista chu Adama hnuhnung zâwk, mi zawng zawng an nun theihna tûra thi a nih thu min hrilh. Adama-ah chuan mi zawng zawng an thi a; Kristaah erawh chuan mi zawng zawng tihnunin an awm thung a ni. Adama avangin khawvêlah thihna a lo lût a; Krista avangin chatuan nunna kan chang leh thei thung a ni (Rom 5:12-21).