INNEIHNA

EPHESI 5:31-32
Chumi avâng chuan mipain a nu leh pa kalsanin a nupui a vuan ang a; tin, an pahnih chuan tisa pumkhat an lo ni tawh ang. Hei hi thuril thûk tak a ni; kei chuan Krista leh a kohhran thu a sawina niin ka hria.

Inneih hi a ropuiin a ril hle a, Paula phei chuan ‘Thu ril thûk tak’ a ti hial a ni. Juda-hovin mihring lo pian nâna thil pawimawh pathum an sawi ṭhinte chu – mipa, hmeichhia leh Thlarau Thianghlim a ni a. Kristianna huang chhûngah chuan Pathian, Kohhran, mipa leh hmeichhia an insuihfin thung.

Inneih hi kan la thutakin kan la urhsûn tûr a ni a. Kan Lal Isuan, “Pathianin a zawm tawh chu mihringin ṭhen suh se,” a tih hi a inneite leh an chhûngte pawhin kan vawn nun tlat a pawimawh. Inneihna hmangin Kristian chhûngkaw lung kan phûm a, nupa nun dânin Kristian chhûngkaw hmêl a tilang a. He inneihna aṭang hian Lalpan amah ngaihsak tûr mi, chi thlah malsâwmna an dawnte aṭangin a zawng bawk ṭhin (Mal. 2:15).