A HNENAH KAN AWM RENG

JOHANA 14:23
Isuan a chhâng a, a hnênah, “Miin mi hmangaih chuan ka thu a zâwm ang a; ka Pain ani chu a hmangaih ang a, a hnênah kan lo kal ang a, a hnênah kan awm reng ang.

Mihringte hi awm tlâng tûr leh Pathian pâwl tûra din kan ni. Isuan amah kan hmangaiha a thu kan zawm chuan kan hnêna lo kalin a awm reng dâwn tih a tiam.

Kan hnêna Pathian awm reng bâka thil thlâkhlelh tûr eng nge awm? Pathian nên kan inpâwl reng chuan ṭawng lo pawhin chêtziain a hmangaihna keimahniah a lo lang chhuak dâwn a ni. Ṭawngkaa kan sawi phei chuan hriat awl an va ti dâwn êm! Thu awih hi thil har tak, kan têt tê aṭanga nu leh pain min zirtîr kan la pass chhuah loh a nih ṭheuh ka ring, i zir zêl ang u. Pathian thu i awih ang u. Lawmman, kan hnêna awm a tiam hi a ropui êm mai.

Kan hnênah awm ta che khua a tlai dawn ta e.
Tlai ni kâwla a liam hma hian;
Tlai khua i vâr za ang, Emau dai rehah hian
Chhûn nî a liam zân thimin mi nang si.

Kan hnêna i awm reng theih nân, LALPA, i thu awih tûrin min pui ang che.