NUNNA LALLUKHUM

JAKOBA 1:12
Thlêmna tuar hrâm hrâmtu chu a eng a thâwl e; fiaha a awm hnuin nunna lallukhum, Lalpan amah hmangaihtute hnêna a tiam chu a hmu dâwn si a.

Thlêmna kan tawh lai hian a hrehawm kan ti viau a ni thei, eng anga harsa pawh ni se, Pathian kan hnênah a awm tih kan hriat chuan a thlamuanthlâk ṭhin. Fiahna hi kan nuna ze ṭha lo, Pathian zia nêna inmil lo paihthlâk nân a ṭangkai hle mai.

Rangkachak leh lunghlute hi an laih chhuah hlim chu hman tlâk a ni nghal mai lo. Meia tihthianghlim a, a êkchhia paih a ngai ṭhin. Chutiang bawk chuan keini pawh Pathian tân hman tlâk, mi dangte tâna malsawmna ni tûr chuan keimahnia a ṭha lo lai kan paih bo zêl a ngai a ni. Miin fiahna a kal tlang hnu chuan nunna lallukhum LALPA hnên aṭangin a hmu dâwn a ni.

Thihna ni lovin, nunna lallukhum chang theitu kan ni hi kan va han vannei êm! Pathian hnênah lawmthu sawi mai tûr kan lo ni.

Nunna lallukhum chu khumin
Ni angin an lêng tawh ang.

LALPA, nunna lallukhum chang ngei tûrin min pui ang che.