INHRIATSIAK AIIN I INZÂWMSIAK ZÂWK ANG U

INHRIATSIAK AIIN I INZÂWMSIAK ZÂWK ANG U

— Joseph Bawlte
Rahsiveng, Lunglei

Sam 119:60
I thupêkte zâwm tûrin ka hmanhmawh a, rei ka rial lo.

Mitinte hi kan rilru puthmang a inan loh avângin kan ngaihdân te pawh a inang lo ṭhîn. Mi ṭhenkhat chuan mahni ngaihdân an sawi chhuak nghal pawp pawp mai ṭhîn a, ṭhenkhat erawh chuan sawi chhuah atân a ṭhat leh ṭhat loh thu an han inngaihtuah hmasa ve phawt ṭhîn. A enga pawh chu ni se ngaihdân hran nei vek kan ni a, ka ngaihdân fahrah tê hi han sawi lan ve ka duh a ni.

Keini Mizote hian Pathian thu hi kan hre êm êm a, chu mai ni lovin kan ngâihlu hlê bawk. Ni e, ngaihlut tûr a ni rêng a ni. Lal Isua ngei pawn, “Lei leh vân a ral ang a, ka thu erawh chu a ral lo vang,” a ti a, ral lo tûr hi kan ngaihluin, kan ngaisâng tûr a ni rêng a ni (Matthaia 24:35).

Amaherawhchu, tihsual palh kan nei. Pathian thu hi kan inhriatsiak a, kan inzâwmsiak leh si lo hi a ni. Bible ngei pawn, “Thu ngaithlatu mai ni lovin, zâwmtute lo ni zâwk rawh u; chuti lo chu, mahni inbum in lo ni dah ang e,” a ti a. Mahni inbum kan ramah hian kan tam ang em le? (Jakoba 1:22)

Inrêl te kan chîng khawp a. Hebrai 10:25-ah chuan, “Ṭhenkhat tih dân anga kan inkhâwm te bânsan lovin, i infuih tawn ang u; ni chu lo hnai telh telha in hriatin infuih tawn nasa lehzual sauh rawh u,” a ti a. Kan ramah hian inkhâwm hi chu kan bânsan lo, mah se infuih tawn lovin kan inrêl tawn ta ṭhîn a ni. Kan inrêl tawnna hian min va tichhe nasa tak êm!

Kohhranah camping a awm ṭumin zuin ṭhîn te, drug addict te hoin an sualna te thupha chawiin, Pathian khawngaihna changin piangtharna an chang ve a, chûngho chu fuih a hnêkin, “Kei chu a daih rei ka ring lo, zu a in leh tho ang,” ti ten kan lo rêl a, tûnlaiah ngat phei chuan mitinte hian maipâwl kan pu ta vek em mawni le tihtûr khawpin kan beng a vâr tawh hlawm mai si a, hemi an hriat avâng hian sualah tlu lehin, “Kohhran ho chu engmah an ni lo,” tiin sêlna kan dawn phah ta fo mai. Sawisêl hi a ṭha lo, mah se sawisêlna kan dawn te hi a zung aṭanga thlîr chuan keimahni insiam chawp a nih châng a va tam dâwn êm!

Israel hoten Lal an neih hma chuan rorêltute an nei ṭhîn a. Rorêltu hnuhnung ber Zâwlnei Samuela chungchâng tlem hi kan entawn atân i han târlang teh ang. Israel lal hmasa ber Lal Saula lal atâna puan a nih hnu a, Zâwlnei Samuela’n mipuite hnêna inthlahna thu a sawi khân heti hian a ti nih kha, “Heta hi ka awm a. LALPA hma leh a hriak thiha (Lal Saula) hmaah hian mi sêl teh u le: tu bâwngpa nge ka chhuhsak ngai? Tu sabengtung nge ka chhuhsak ngai? Tu nge ka tihduhdah ngai? Ka mit tidel tûrin tu lakah nge thamna ka lâk ngai? Ka rûl leh vek ang che u,” a ti nih kha. Mahse, mipuiten an chhânlêtna chu, “Min bum ngai lo va, min tiduhdah ngai hek lo, tu ma kut aṭangin lâk âwm loh i la ngai hek lo,” tiin an chhânglêt a nih kha (1 Samuela 12:3-5).

Unaute u, Zâwlnei Samuela ang hian rinawmna leh dikna duh mi hi kan nih a va ngai tak êm! Ram mipuite hmaa huaisen taka ding a, “Min sêl teh u, ka mit tidel tûrin tu lakah nge thamna ka lâk ngai,” ti ngam sawkar hnathawk, politician leh rawngbâwltu hi kan mamawh takzet a ni. Pathian hnênah ṭawngṭainain i thlen ṭhîn ang u.

Unau duhtak, ka thil chah duh che chu; Pathian thu hi midang angin hre rilin, hre thûk lo mah la, i hriat chhun chhun kha zâwm tûrin ka chah duh che a ni. Lal Isua ngei pawn, “Nangnin min hmangaih chuan ka thupêkte chu in zâwm ang,” a tih kha. Lal Isua thupêkte i hriat theih nân i phone bih lovin i Bible bih zâwk tawh rawh (Johana 14:15).

Subscribe
Notify of
guest
Email will not be published
3 Comments
oldest
newest most voted
Inline Feedbacks
View all comments
Chhuana thanga
Chhuana thanga
1 month ago

Atha lutuk e thildang pawh han ziakzel tehkhai

Zahmingthanga
Zahmingthanga
1 month ago

A van tha tak em!!!!!. Lalpan malsawm rawhse.

Zahmingthanga
Zahmingthanga
22 days ago

A va tha tehlul em!!! Lalpan malsawm rawhse.

Copyright © 2017-2020 Our Daily Bread Mizo.
Privacy Policy
3
0
Would love your thoughts, please comment.x
()
x