THLÊMNA ATA CHHANCHHUAH

2 PETERA 2:9
Lalpa chuan amah ngaihsaktute chu thlêmna ata chhanchhuah dân leh, fel lote chu rorêl ni atân hrem chunga khêk dân a hria.

Thlêmna hi kan tihsualna hmanrua ni lovin kan lo puitlin zêl a, kan lo hman tlâk deuh deuh a, kan lo thianghlim deuh deuh zâwk nan a hmanrua a ni.

Pathian hi min siamtu, enkawltu, mahni kan inhriat ai pawha min hrechiangtu a ni a, a hnêna innghah hi a thlamuanthlâk. Mihring kan nih avângin chaklohna kan nei ṭhin. Thlarauin a peih a, tisain a zawh loh hunte a lo awm ṭhin. Kan Pathian hian amah ngaihsaktu te, amah bêltute chu thlêmna ata chhanchhuah dân a hria a, (Sam 37:23-24) a va thlamuanthlâk em!

Pathianin a mite suara an tlûk pawhin an thawh leh theihna a ruahman ṭhin. Lalpan Nova leh Lota te a humhim angin keini pawh hun tâwp thleng chhel tûra min tih hi awih ila min humhim ang (Thup 3:10).

Ṭanpui, Chhandamtu dîl la,
Thlamuan, tichak leh vawngan,
Aman a pui duh a che,
A hruai zêl fo vang che.

LALPA, i hnên kan rawn pan e.