ISUA ZIA ‘TLÂWMNA’

— R.K. Vanlalhruaia
Kathmandu, Nepal

MATTHAIA 20:28
Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zâwka a lo kal ang khân,” a ti a.

Isua zîrtîrte kha mihring buaina lian ber mai ropui leh thiltithei nih lamah khân an inngur ve fo a nih hmêl viau mai. Setana zia chu chapona leh ropui nih tum kha a ni tlat mai a. A bawia awmte ziaah chu chu a lang chiang hle rêng a ni.

Isua erawh tlâwm ral raiha nun hlânin hnehtu Lal Ropui a ni thung a. Chawimawi phû ngawih ngawih kha chhiahhlawh leh thawktuah a ṭang tlat mai. He Isua tlâwmna hi kan entawn tûr ber a ni si. Amah kan hnaih poh leh kan tlâwm dâwn a lo ni. Isua ringtute kan tlâwm nasat poh leh kan lâwmman a pung ve thung dâwn a ni si a.

Setana zia chapona leh ropui tumna nge Isua zia, tlâwmna leh ral raihna kan thlan dâwn? kan duh thlan tûr a ni. Isua kan thlan chuan kan ziaah a lang dâwn a ni. Kan buaina lian ber chu Isua thlang chunga setana zia chhawm kan tum hi a lo ni fo mai. Isua zui chuan Isua zia chhawm a ngai.