PATHIAN HNAIH

— Joseph Bawlte
Rahsiveng, Lungei

Ramtuk thla (February) khân tûk khat chu atṭa ka siam dâwn a, a nuaina tûr kan lo tibo daih mai a. Rang takin kan inchungah atṭa nuaina siamna tûr mau a awm tâk mialin tiin ‘vai vawih aia rangin’ kan inchungah ka tlân chho ta nghal a, ka hmu ta rêng bawk a; tichuan, arâ la vatin ka siam ta nghal a.

Kan inchunga mi ni lo mau ṭha tak tak leh tharlâm bawk si ramhnuaiah a tam tehrêng nên; engati nge kan inchung a mi kher ka hman? A chhan chu min hnaih bertu a nih vâng a ni. Chutiang chiah chuan Pathian pawh hian a rawngbâwl tûr hian khawvêl thil a mi hausa leh thiam tak takte ai chuan Amah hnaihtu hi a duh zâwk.

“Kei atân erawh zawng Pathian hnaih hi a ṭha a ni,” titu Lal Davida pawh khân Pathian a hnaih tlat avângin berâm vêngtu aṭangin Pathianin a hnam thlan Israel fate lal atân hriak a thih a nih kha.