MAHNI NUNNA LÂK

JEREMIA 17:21
Lalpa chuan heti hian a ti e: In nun hi fîmkhurpui hle teh u.

Mi thiamte chuan mahni intihhlum duhna hial rilru miin a put hi natna tihdam theih a nih thu leh tam tak tihdam an nih tawh thu an sawi. Mahni intihhlum duh chhan hi chi hrang hrang a awm thei a. Eng pawh ni se, Pathian min pêk nunna hlu tak fîmkhurpui nachâng hre lo khawpa mahni nun lâk duhna neite hi mi khawngaihthlâk leh ṭawngṭaipui ngai tak an ni.

Mahni intihhlum hi Bible leh ram dân kalh a ni a, a tumte pawh hriat an nih chuan tântîr bâkah pawisa chawitîr theih an ni. Tin, Setana thangkam a ni a, mahni nunna lâk duhna rilru pu chu Setana thang hmaah a awm tihna a ni a. Pathian râwn hmasak nachâng a hriat chuan hremhmun mei aṭangin chhan chhuahin a awm thei a ni. Intihhlum duh tam berte hian a thâwi talin an ṭhiante emaw mi dang hnênah emaw an sawi hmasa ṭhin a. Chutiang hria chuan an chhûngte emaw rawngbâwltute emaw a rang thei anga hriattîr a ṭha. Invênpui nachâng hriat hi an nun chhanna ṭha tak a ni.