ṬHURO ANGIN

MATTHAIA 10:16-17
Ngai teh u, chinghne zînga berâm awm angin ka tirh che u hi; chutichuan, rûl anga finga, ṭhuro anga pawikhawih lovin awm ang che u. Nimahsela, mihring lakah chuan fîmkhur rawh u; rorêltuhote an mantîr dâwn si che u a, inkhâwmna inahte an vua ang che u a.

Khawvêl chu intlânsiakna hmun, a chak leh pamhamten chan ṭha an chan fona hmun a ni. Kawng dik lo thlangte an hlawhtlin a, kawng dik thlangtute an hlawhchham châng a awm. Lalpan nang leh kei hi thil dik lo ti ve lova, kawng dik thlang tlat tûrin min duh.

Isuan amah zuitute chu harsatna, tihduhdahna an tawh tûr thu a hrilh lâwk rualin Pa thlarauvin a awmpui tûr a sawi. Mi huat hlawhna kârah pawh a tâwp thlenga tuar peih chu chhandam an ni ang. Thih thlenga rinawmte hnênah nunna lallukhum pêk a tiam a, mahni hrehawm pawisa lovin ni tin a kraws pu a zui a ngai. Chutih rualin rûl anga finga ṭhuro anga nunnema awm a ngai.

I ram tâna thawk tûra min koh vângin,
Min thuam la, i thu leh hmangaihnain;
Huaina, chhelna, inngaihtlâwm leh lainatna,
Nangmaha awm zawng zawng min neihtîr la.

Ringtu fimkhur lo chuan kawng dik a zawh pelh fo ṭhin.