TLANGVÂLTE HNÊNA THURÂWN

THUFINGTE 3:5-8
I thinlung zawng zawngin Lalpa ring la, Nangma hriatnaah innghat suh; I kawng zawng zawngah amah hre reng la, I kawngte chu a kawhhmuh zêl ang che. Mahni ngaihin intifing suh la; Lalpa chu ṭih la, sual kalsan rawh. I lai atân hrisêlna a ni ang a, I ruh atân thlîng a ni ang.

He thurâwn fing tak hi tlangvâlte tân chauh ni lovin ṭhalai zawng zawng tân a ni tih hre hmasa ila. Helai thuin min kawhhmuh a tum nia lang chu mahni finna leh hre ve nia inhriatna dah bova, engkima Lalpa rin a, amaha innghah ṭhatzia thu a ni. Pathian awm rin lohna thlite hian min nuai ve ang tih a hlauhawm hle mai.

Ṭhalai tam tak hi chuan mahni ngaih dân ṭha berin kan hria a, Pathian ngei pawh ro kan rêl khalh fo ṭhin a; kan nu leh pate thurâwn pawh engah mah kan ngai lo fo ṭhin niin a lang. Kan taksa leh kan ngaihtuahna hi chak mah se a fing tâwk lo fo ṭhîn tih kan hriat a pawimawh. Nu leh pate hi kan Pathian hmuh theihte an ni a. An thu âwihtute chuan Pathian thu pawh an âwih nge nge ṭhîn a ni.