ENGAH NGE I RINHLELH LE?

MATTHAIA 14:30-31
Nimahsela, thli tleh chu a hmuhin a hlau va, a pil dâwn ta mai a, “Lalpa, min chhandam rawh,” tiin a au ta a. Tin, Isuan a ban ta nghâl a, amah chu a chelh a, a hnênah, “Nang, rin tlêm, engah nge i rinhlelh le?” a ti a.

Isuan mipui sângnga a hrai hnû khân a zirtîrte chu râl leh lama kal tûrin lawngah a chuantîr a. Lawng chu dîl laia a awm laiin tuifâwnin a vawrh a vawrh a, hlauthâwng taka an awm lai chuan khawfîng chah dawn laiin dîl chungah kea kalin an hnên lam a rawn pan a. Zirtîrte chuan, ‘Hmuithla a nih saw’ tiin thlaphângin an âu vak a. Isuan amah a ni tih a hrilh chuan, Petera chu lawng aṭanga chhukin tui chungah kein a kal a. Isua lam en lova thli tleh a hmuhin a hlau va, a pil dâwn ta mai a, Isuan a chelh nghâl a ni.

Keini pawh min hual vêltu harsatna thlipui kan en chuan kan thlâ a phâng mai ṭhin. Isua lam i en ang u.

Thlipui tleh mah se, tui tifâwnin,
Khawdur te, khawpui te, kâwlphe-êng mahin,
Lawng a tichhe thei lo, lei leh vân Lal,
A chhûnga awma kha ring se langin;
A thu lâwm takin an awih fo ṭhin, ‘Bâng, bâng rawh u.’

En tûr dik Krista kan en chuan kan thlâ a muang ang.