I RINNA A NASA EM MAI

MATTHAIA 15:28
Chu veleh Isua chuan a hnênah, “Hmeichhia, i rin a nasa êm mai; i duh ang takin i chungah awm rawh se” a ti a, a chhâng a. Tichuan, a fanu chu chumi achinah chuan a lo dam ta mai a.

Isua chu Tura leh Sidon bialah a kal a, Kanan hmeichhe pakhatin a fanu tidam tûrin a lo ngên a. A zirtîrte chuan an hnunga a au a au chu an ning a, nimahsela, hmeichhia chu a rawn kal a, ṭanpui a rawn dîl leh a. Isuan, Kanan hmeichhe inngaihtlâwmzia a hmuhin a khawngaih a ni.

Ui hi Juda ten an dah sâng lo, Bible-ah pawh dah sân a ni lo. Grik ṭawngah chuan ui hi hmeichhe zaktheilo leh kâwlhrâwng sawi nân an hmang ṭhîn. Isua erawh chuan ‘ui’ tih a hman hian awmze chhe lam ni lovin a hmang niin mi thiam ṭhenkhat chuan an ngai.

Isuan Kanan hmeichhe tih tak zet zia leh a inphahhniam dân a hmu a, a fanu ramhuai man chu a tidam ta a ni. Inngaitlâwm tak chunga ringtute ṭawngṭaina chhânin a awm ṭhîn.

Kei ka ring e, kei ka ring e,
A thu ring nghetin ka awm;

Kan ṭawngṭaiin thinlung leh tih tak zetin kan dîl em?