INNGAIHTLÂWM HI MI DANG TÂN DAMNA A NI

JONA 1:12
Tin, ani chuan an hnênah, “Min la kâng ula, tuifinriatah hian min theh chhuak rawh u; chutichuan, tuifinriat hi in tân a fâwn tawh lo vang; keimah avângin in chungah he thlipui na tak hi a tleh a ni tih ka hre si a,” a ti a.

Jona chu Ninevi khawpuia simna thU tlângaupui tûra tirh a nih laiin Tarsis lam pan lawngah a chuang a. Thlipui na takin a nuai avângin mangang takin an awm a. Amah avânga thlipui leh tuifâwn tuar an nih a inpuang a, ‘keimah avângin’ a intih ngamna chu a chuanpui mi dangte tân damna a lo ni a, ama tân ngei pawh a ni bawk.

Mihring lei leh kâin sawi chhuah harsa a tih ber chu ‘ka dik lo a ni’ tih hi a ni e, an ti a, a dik hlein a rinawm. Mi dang dik lohna hmuh theih viau lai hian mahni dik lohna chu kan en khûm fo. Mahni dik lohna sawi chhuah ngamnaah hian mi dangte pawh an lo dam zâwk ṭhin a, chutah chuan kan tân pawh damna a lo awm a, chu chuan rilru lama natna neiteah pawh damna leh inremna a thlentîr ṭhin a ni.