TU NGE ROPUI BER ANG?

MARKA 9:34-35
Nimahsela, kawngah chuan, “Kan zîngah tu nge ropui ber ang?” tia an lo inhnial tawh avângin an ngawi ta reng a. Tin, ani chu a ṭhu a, sâwm leh pahnihte chu a ko va, an hnênah, “Tu pawhin hmasa ber nih a duh chuan, mi zawng zawng aia hnuhnûng berah a awm tûr a ni a, mi zawng zawng rawngbâwltuah a awm bawk tûr a ni,” a ti a.

Ropui nih inchuh fo zîngah zirtîrte pawh an bâng bîk lo. Mi hnuaihnung nih ai chuan mi challang nih kan duh a. Thu pawt chattu, hotu leh hruaitu nih kan duh bawk. Thu petu ai chuan mi dang rawngbâwlsaktu hniam zâwkah ngaih a ni. Lal ram linglet, Isua lal ramah chuan khawvêl ngaiha hnuhnung ber chu Pathian ngaiha hmasa ber a ni fo. Mihring zînga an chawimawi chu Pathian mithmuhin tenawm tak a ni (Lk 16:15).

Ropui inchuhna hmunah inremlohna a tam, îtsîkna leh inhuatna a pung. Krista hnungzuia mi dang rawngbâwltua awmna hmunah inremna leh hmangaihna a awm.

‘LALPA Isua ang turin’ kan tih lai hian,
Khawvêl mite ang maia khawvêl lam thil;
Kan ngaih ropui zâwk si chuanin,
Boralna kawng zawh kan ni ang.

Mi dang rawngbâwlsaktu nih ṭheuh i tum ang u.