KAL MAI RAWH

MATTHAIA 20:13-14
Ani erawh chuan, an zînga mi pakhat hnênah, ‘ṭhiana, i chungah eng mah ka tisual hlei nêm: duli hlawhah kan inrem lo vem ni? I ta kha la la, kal mai rawh; nangmah ka pêk che ang bawk kha he hnuhnûng ber hnênah hian ka pe duh a ni.

Palestina ramah chuan September tâwp lamah grêp hmin an seng ṭhin a. Ruah tui tlâk hmaa an seng zawh hman loh chuan a chhe ṭhin. Hnathawktu an mamawh, buh lu chuh lai a nih avângin nilênga thawk hman lo pawh an ruai duh ṭhin. Bazar hmunah inhlawhfaten ruaitu tûr nghâkin an awm ṭhap ṭhin.

Duli hlawhah an inrem a, hlawh an sem a, a tîra thawkte leh a thawk tlâi ber thlengin hlawh inang an pe ta ṭheuh a. Itsîkna avângin a tîra mite an lungawi lo a ni. Khawngaihna hi kan hre thiam lo fo, a tâna rei tak thawk tawh te, rei vak lo thawk leh thawk hman lote pawh Isuan khawngaihnain min chhandam vek. Kan za atân phal takin vân ram kawngkhâr a hawng. A va lawmawm êm!

Heti mai hian chhandam ka ni a
Ka nun hlui leh sulhnu a chhui ve lo
A khawngaihna ka tâna ‘Amen’ lo tih mai hi
Chatuan atân nunna a lo ni.

Sual sim a Isua pantuten vânram an chang dâwn.