TALENT I TIPUNG EM?

MATTHAIA 25:21,29
A pu chuan a hnênah, ‘Bawih ṭha leh rinawm, i tiṭha e; tlêm te chungah i rinawm a, tam tak chungah ka awmtîr ang che; i pu lâwmnaah lût rawh,’ a ti a. Tu pawh a nei apiang an pêk belhchhah ang a, a lo ngah ang; tu pawh a nei lo apiang erawh chu a neih chhun pawh an lâksak ang.

Bâwihte hnênah an pu zin tûrin talent a sem ṭheuh a. An pu lo haw leh chuan a sum chanchin a tifel a. Talent nga dawngtu leh talent hnih dawngtuten an lo tihpun avângin an chungah an pu a lâwm a, a aia tam mawhphurhna a pe a. Talent khat dawngtu chuan a tihpun ve loh avângin a pu chuan a hau va (Mt 25:26-27).

Pathian thilpêk leh thlarau thilpêk bâkah thiam thil dangte a inzât lo a ni mai thei. Lal Isua a lo kal leh hunah a thilpêk kan tihpun leh tihpun loh a enfiah ang. I inring ṭheuh ang u.

Ni tiamte a hnai ta, a lo kal dâwn e,
Nite a kiam, hun a tawi ta;
Tlan saten zai rem se, a lo kal lawm nân,
Hnam tin inpeih rawh se.

Talent i tipung ṭheuh ang u.