HMINGṬHATNA

— Chhantea (Oriela patea)
E. Lungdar

THUFINGTE 22:1
Sum tam tak aiin hmingṭhat hi thlan zâwk tûr a ni a, Tangka leh rangkachak aiin duhsakna a ngainatawm.

Sum leh pai hausakna aiin hmingṭhatna a duhawmzia leh thlan zâwk tûr a nih zia he khawvêl hun kal tawh khân nasa takin a ti lang. Mi hausa tawntaw Rock Feller-a chanchin aṭang te, Monroe-i te, Elvis-a te leh midang tam tak te hei hian a tifiah ti a sawi mai tûr an kat sup ang.

Hmingṭhatna tluantling nei tûr chuan nun dân ṭha, nungchang ṭha neih a ngai a. Chumi piahah chuan Pathian ṭihna tak tak neih a ngai bawk. Tam tak hi chuan heng thil nei tûrin sum leh pâi hausakna kan neih hnu hian a dang hi kan mausâm ta ṭhin a, chu chuan pawisak neih lohnaah min hruai a. A dik leh diklo pawh thlu lovin hmingṭhatna aiin sum leh pai te kan thlang a, kan nun leh kan zahawmna hi sum hmanga teh tûr emaw tiin keimahni ngei kan invui liam mêk teh zawng a nih hi.

Khawvêla thil hlû tangka leh rangkachak aiin duhsakna a hlu zâwk a tih te hi a va dik êm. Dik taka deh chhuah sum leh pai thil engkim te hi hlu êm êm mahse a neitu tân chauh a ni. Mahse, miin a phâk tâwk leh a dinhmun mila a ṭha ber duhsakna min hlân tluk a hlû hi mihringte tân a aia hlû a awm lo.

Sum leh pai hausakna hi hman thiam loh chuan mihring nun tichhetu atân mai a ni thei (Thuf 1:19; 10:2; 13:11). Chutihrualin mihringte pawhin hlutna te, hmingṭhatna te, zahawmna te hi sum leh pai ngah leh ngah loh aṭanga kan teh anih chuan kan tehfung hi keimahni ngei pawhin kan rintâwk ka ring lo ṭhin.

Aw le, a tâwp berah chuan Bible a “Thufingte” lehkhabu hi mihringte tân a aia lehkhabu ṭha hi a vâng hle ang. Zir tûr, finna chharna tûr, zawm tûr leh nunpui tûr thu fûnkhâwmna lehkhabu hlu tak hi… vânah a ṭangkai dâwn lo a, lei a hman tûr a ni tih hi i hre thar leh ang u.

Lalpa’n a thu malsâwm rawh se.