PHILADELPHIA KOHHRAN

— Chhantea (Oriela patea)
E. Lungdar

B/r Thupuan 3:7-13

Mithiamte chuan Philadelphia tih hi “Unau inhmangaihna” tihna a ni an ti. He khua hi Lal Attalus II-na in a din niin sawi a ni a, tichuan a dintu hi Philadelphos tia hriat lâr a ni a, chumi hming chawiin Philadelphia tih a lo ni ta a, Ludia ram khawpui pakhat grêp chînna hmun niin sumdâwnna hmun pawimawh tak a ni bawk a ni.

Philadelphia khuaah hian engtikah nge kohhran hi din a ni tih hriat a ni lo a ni.

THU PUAN 3:8
I thiltihte ka hria, chakna tlêm tê chauh i nei a, chuti chung pawhin ka thu i pawm a, ka hming pawh i phat lo va; tu ma khâr theih loh kawngka hawn sa i hmaah ka dah e.

Philadelphia kohhran hi kohhran chak tak a ni lo a ni ang, ‘chakna tlêm tê chauh i nei a‘ tih a ni tlat. Chutih rualin chak lo tak chung pawha ‘Isua tân an rinawmna erawh hi chu fak tlâk a ni thung‘. Chuvangin a ni ang demna thu rêng an dawn ve loh ni. Eng vânga fak hlawh ta bîk nge an nih ang? Tihduhdahna leh nêksâwrna kârah Lal Isua thu an pawm a, a hming an phat lo a, a tâna an rinawm tlat vâng a ni ngei ang. Chutianga a tâna nung tlat tân chuan kan Lal Isuan ui rêng a nei lo. ‘Tuma khâr theih loh i hmaah kawngka ka hawng e‘ a ti. Vânram kawngka te, Lal Isua lalna ram zauh zêlna kawngka te chu an tân hâwnin a awm hi a va ropui êm.

Kohhran hi member tam leh tlêm te, sum leh pai ngah leh biak in neih ropui te hi Lal Isua min tehna a ni lo tih a va chiang êm. Lal Isua duh dân a nung a, rinawm leh fel leh taima tak a a rawng kan bâwl chuan eng kohhran pawh niin lei a tehna hmang a ropuina êm êm sawi tûr nei lo mah ila kohhran ropuina Krista zârah kan tân kawngka hawnin a awm zêl dâwn a ni.

THU PUAN 3:10
Ka chhelna thu i pawm avâng khân, leia awmte fiah tûra khawvêl zawng zawng chunga fiahna hun lo thleng tûr lakah chuan kei pawhin ka humhim ang che.

Heta fiahna tih hi mithiamte chuan thlêmna ti pawhin an sawi. He fiahna hi a nasa hlê dâwn a, Krista thu leh a chhelna thu an pawm avângin hun tâwp a fiahna râpthlâk tak lo thlen ve hunah humhim a tiam a ni. Heta lang chiang êm êm chu Pathian hian a kohhran mite hi tuarna te hi pumpelh dân ni lovin tuar chunga chhel taka awm leh a tuar chhuah dân min zirtîr a lo ni zâwk a ni.

Kohhran ho dinna lungpui Krista anih chhûng chuan kan him dâwn si a.

Lalpa’n a thu malsâwm rawh se.