THIAMCHANTÎRNA

— Chhantea (Oriela patea)
E. Lungdar

B/r:- Rom 8:33,34 ; 3:23,24

Thiamchantîrna tih hi sawi dân chi hnih a awm thei ang, a pakhatnaah chuan rorêlna a kâwk a, a pahnihnaah chuan “Chhandamna” a kâwk thei bawk ang.

Khawvêla mihring lo piang chhuak zawng zawng te hi Eden huan thuthlung bawhchhiatna avângin thiam loh changin kan lo piang a, dân chi hrang hrang avânga thiam chan tumin bei mah ila mihring tân tlin rual a ni si lo. Thiam loh chang te min tlan tûrin Pathianin a fa khawvêlah a lo tîr a, Khawvêl pumpui bawhchhiatna vânga thiam loh chang te thiamchantîr tûrin a lo kal, tah chuan keini dân avânga bawhchhe fate hian lo tih ve tûr kan nei a, chu chu amah (Krista) lo rin kha a ni (Joh 3:16-18). Amah ringlo erawh chuan chu thiamchantîrna chu chang lovin thiam loh changin an awm dâwn a ni. Hei hian rorêlna leh chhandamna a kâwk nghal ve ve a ni.

ROM 3:23-24
Mi zawng zawngin thil an tisual tawh vek a, Pathian ropuina an chang zo ta lo a ni); chûng ringtute chu, Krista Isuaa tlanna awm avâng chuan, a khawngaihnain a thlâwna thiam chantîrin an awm a.

Thiamchantîrna hi Pathian aṭang chuan tling lo chunga tling a pawm, misual kha mifel a chhiar tihna te pawh a ni thei ang. Kan aiawhtu Kristaah zâwk min en avânga nang leh kei hi thiam chang mai kan ni si a, ro min rêlsaktu leh thiam loh min chantîr theitu ber khân kan aiawhin Pa dinglam a min sawisaktu kha a ni si a. Tuin nge thiam lo min ti ang le?

Mahse, he thiamchantîrnaah hian tih engmah neiloin khawngaihna avânga thawhsak vek ni mah ila chu khawngaihna chang ve tûr chuan tih ve tûr kan nei. Chu chu kan aiawhtu KRISTA lo rin ve mai kha a ni e.

Pathianin a thu malsâwm rawh se.