EPHESI KOHHRAN HNÊNA LEHKHATHAWN

— Chhantea (Oriela patea)
E. Lungdar

B/R :- Thupuan 2:1-7

Ephesi khua hi Mediterranean tuipui kam, Johana hunlaia Asia Minor huam chhûng khaw lian ber leh pawimawh ber pâwl niin, lawng chawlh hmun pawimawh tak leh sumdâwnna hmun pawimawh a ni. Sawrkar hmun pawimawh niin sakhaw lamah pawh Rom pathiannu Diana biakna leh a lim chherna hmun a ni an ti.

Ephesi khuaa kohhran hi Paula din nia ngaih a ni a, khaw lian leh pawimawh a nih avângin kohhran pawh hi a lian ve hlê niin an sawi.

Chu kohhran lian leh pawimawh chu Isuan engtin nge a tih i en teh ang.

1. A thil tih te, an thawhrim zia te, an chhel zia te a hmuhin a fak êm êm a. Misualte an ngaih theih loh zia te, zirtîrna dik lo thehdarhtute leh tihduhdahna avânga an tuar nasat hlê lai pawhin rinna humhimna kawngah leh Krista tâna ṭhahnem ngaihna kawngah pawh fak a hlawh hle.

2. Demna a nei… khîng kan sawi tâkah te fak hlawh hle mah se, demna a nei tho. Chu chu… “I hmangaihna hmasa ber kha i bânsan tâk avângin,” a ti a ni. Lal Isua kha a tîra an hmangaih ang khân an hmangaih ta lo em ni ang? Sumdawnna hmun pawimawh, sawrkar hmunpuiah chuan ni tin nun eizawnnaah inelna te a nasain, Lal Isua leh a kohhran hmangaihnaah an tlachhe ta deuh em ni ang?

Ni e, kan tunlai kohhran pawh hi i inchîkin mahni nun ṭheuh hi i bih ang u. Hmâna Krista leh kohhran tâna kan tih ang rengin kan la ti nge hêng te chu a hming a mawia kan la ti der derin kan nun pumpui hi khawvêl leh a thil chhep chhel hian min lo kaihhruai reng zâwk. Kan hmangaihna hmasa ang khân kan la hmangaih em?

3. Lal Isuan tih tûr a tuk… Chutichuan, i tlûksan tâk chu hre reng la, simin, a tîra i thiltih te kha ti leh rawh… Kan Lalpa hian Ephesi kohhranho chu a tîra an hmangaihna ang kha nei leh tûrin a phût tlat a. Chumi an neihna tûr anih chuan an nun mêka sim ngai te sim tûrin a phût tlat a ni.

Keini pawh hian… hmân a Pathian kan lendunpui ṭhinna nun tûna kan hloh tâk hi nei lêt leh tûr hian min phût tlat a. Chumi tûr chuan sim ngai te kan sim ve hi mihring lamin kan tih tûr a ni.

Chutianga kan tih loh chuanin… I khâwnvâr dahna kha a hmun ata ka sawn ang tiin nang leh kei, Ephesi kohhrante hi min fuihin min vaukhân a ni e. Ni e, sum leh pâi te ngahin, biak in te nei mawi in, Kohhran chêt vêlna lian hlê mah se la, thinlung lam entu hian kan tlûksan tâk amah hmangaih lêt thar tûrin min phût tlat a ni.

HETAH LO ṬHIAT MAH SE, HMUN DANGAH A DINTHAR THEI SI A.

Lalpa’n a thu malsâwm rawh se.