INRING RENGA AWM

THUFINGTE 27:1
A tûk lama thil lo awm tûr chhuang suh, Chumi ni chuan eng nge a rawn chhuahpui dâwn i hre si lo.

Shaftesbury-a chuan, “Ka hnung lam kum 40 kalta aṭang khân tâwtawrâwt rîin min pawt chat phut thei tih ngaihtuah lâwk lovin ka hna bul ka ṭan ngai lo,” a ti a. Ani tân chuan inpeih loh a awm dâwn lo a ni.

Kan taksa mamawh tui leh chawte pawh lem sual palha thi mai thei kan ni a. Kan lungphû pawh châwl thut thei a ni. Tuma’n kan hma lam hun kan sawi thei lo, Lalpa thû a ni. Jakoba pawhin, “Lalpa’n rem a tih chuan kan dam ang a, chumi khami kan ti ang in ti tûr a ni,” a ti (Jak. 4:15).

Naktûka ni lo chhuak tûr hian eng nge a rawn chhuahpui dâwn kan hre si lo va; chuvângin, inring renga awm hi kan tih tûr a ni. Lal Isua pawh lo kal thut thei reng a ni. Lo kal tûr, kan Lal Isua ngei pawhin, “Chuvangin, nangni pawh inring rengin awm rawh u, in rin loh hunah Mihring Fapa a lo kal dâwn si a,” tiin min hrilh a ni (Mt. 24:44).