LUNGAWINA

PHILIPPI 4:11
Ka tlâkchham thu sawi zawng ka ni lo ve; kei zawng eng ang pawhin awm mah ila, lungawi zêl ka chîng tawh si a.

Khawvêla thil hmuhnawm ber chu ‘lungawi hmêl’ a ni an ti ṭhin a. Hei hi a dik a nih ngai chuan thil hmuhnawm lo ber pawh ‘lungawi lo hmêl’ a ni ngei ang.

Tirhkoh Paula nun hi zir tham a awm hlê – hrehawmnaah te, nêksâwrnaah te, hnawhchêpnaah te, vuaknaah te, lung in tânnaah te, buainaah te, thawhrimnaah te, mutmawhnaah te, chaw ngheinaah te, luite laka hlauhawmah te, suamhmangte laka hlauhawmah te, khawpui leh thlalêra hlauhawmah te, chaw nghei leh tuihâlnaah te, khawsik leh saruaka awm te a tuar a. Hengte bâkah Kohhranho leh mi chak lote a veina rit taka delh rengtu a nei bawk a (2 Kor. 6:4,5; 11:22-29). Heti chunga a lungawi zêl thei hi a va ropui êm!

Lungawi zêl thei nun a neih avâng hian ‘mi tichaktuah chuan engkim ka ti thei a ni’ a tih theih phah hial a ni (Phil. 4:13). Lungawi thei mite hi mi inngaitlâwm, mahni aia Pathian dah hmasa zêl ṭhin, Lalpa ṭih mi an ni ṭhin.