ṬHIAN ṬHA

THUFINGTE 17:17
Ṭhian chuan eng lai pawhin a hmangaih reng a, Mangan ni atân unauva piang a ni.

Hman lai Mizo pasalṭhate khân sa huai leh râl lakah pawh ṭhiante chhan nân an nun hial an chân ngam ṭhin a, an entawn tlâk hle. C.B. Edwards-a chuan, “Ṭhian leh hmêlhriat danglamna chu – ṭhian chuan min ṭanpui a, hmelhriat chuan thurâwn min pe,” a ti.

Ṭhian ṭha chu a ṭhian tân a rinawm a, thurûk engkim an hrilh ngam ṭhîn. A dik a, thlei bik a nei ngai lo va, a bula awm a hahdam ṭhin. A insûm thei a, hmêlma a insiam ve ngai lo. Khawsak theih lai leh chan a ṭhat deuh laia ṭhian an awm a, chhiat ber lai pawha ṭhian an awm bawk. Ṭum khat chu sâp ram chanchinbu pakhatin ‘ṭhian’ sawifiahna inziahsiakna an buatsaih a. Chhânna sâng tam tak lût zîngah he thu hi pakhatna atân an thlang. “Ṭhian chu – khawvêlin an chhuahsan vek lai che a i kianga lo lût duh awm chhun hi a ni,” tih hi. I ṭhian tân khân ṭhian i tling em? A mualpho leh a chan chhiat veleh i hlat a nih chuan a tân ṭhian ṭha i ni thei lo vang. Publilius Syrus-a chuan, “I ṭhian chu a rûkin zilh la, mi dang hriatah chuan fak rawh,” a ti.