HMEICHHE ÂN HMANG
THUFINGTE 27:15
Khawchêng leh hmeichhe ân hmang chu, angkhat an ni.
Khua a chhiat a, ruah a sûr tluk tluk mai chuan a ninawm kan ti awl êm êm ṭheuhva, ni hnih emaw lek a chên pawh hian ‘kan khua chu ava ninawm tawh êm’ kan ti thlazen hlawm zêl nia! Hetiang a nih avâng pawh a ni mai thei, Bible pawhin hmeichhe ân hmang nên pawh a rawn tehkhin ni!
A ṭul avânga ân hi a awm ve thei a, ṭul lêm lovah pawh tihṭhana neih avânga ân thlâkzen a awm ve thei bawk. Mahni inchhûnga ân cheh lutuk te, mahni ṭhenawm khawvêngte ân khum vak chîn te leh ni tina mahni thawhpuite ân khum fo ang chi te hi thil mawi lo tak leh chîn ṭhana neih loh tawp chi a ni. Ân hmang deuh ho hi miin an zah lo va, a hlauhvin an hlau zâwk ṭhîn. A chhan leh vâng ṭha tâwk a awm chuan ân pawh hian awmzia a nei ve tho va; amaherawhchu a chhan leh vâng ṭha awm chuang si lova ân thlâkzen hi mi dang tân khawchêng anga ninawm a ni thei. I chîng ve em le?
