LALPA DÂWR DÂN DIK
2 CHRONICLES 16:9
A lama rilru dik tak putute chunga a chakzia tilang tûrin khawvêl zawng zawngah Lalpa mit chu a lêng ruai ruai ṭhîn a ni.
He thu mâwi tak hi Juda lal Asa hnêna zâwlnei Hanania sawi a ni a. Lei lalte leh sipaiho chakna rinchhan aia Lalpa chakna rinchhan a hlâwkzia sawi pahin, rilru dik tak pu chunga Lalpa dâwr a hlâwkzia a rawn sawi chhuak a ni.
Kan Pathian hi a thianghlim a, a dikin a rinawm a; rilru dik tak pu chunga a hnêna dîlna thlentute tihhlawhtlinsak tûrin khawvêl hmun tinah Lalpa chuan a mit a lên ruai ruai reng a. Kan zirna lamah te, kan hna dîlah te, mi mal leh chhûngkuaa harsatna kan tawh thilah te pawh Pathian hi kan tân ṭanpuivartu hnai reng a ni a. Amaherawhchu mahni hmasial râna Pathian hnênah hian ṭawngṭai awl tak a ni ṭhîn.
A lawm tlâk ṭawngṭaina a hnêna kan hlan a pawimawh. “Ka thinlunga sualna ka ngaihsak chuan Lalpan mi ngaithla lo vang,” (Sam 66:18) tiin Fakna hlaah chuan kan hmu a. Jakoba chuan, “In dîl a, in dîl dik loh avângin in hmu lo, in nawmsak nân hman in tum si a,” (4:3) tiin min hrilh bawk. Eng rilru puin nge i ṭawngṭai ṭhin le?
