SAMARI MI

JOHANA 4:9
Chutichuan, Samari hmeichhia chuan a hnênah, “Nang Juda mi i ni a, kei Samari hmeichhia ka ni si a, engtizia nge ka hnêna in tûr mi dîl?” a ti a. (Juda-ten Samari mite chu engah mah an hmang ngai si lo.)

Samari ram hi Israel hmâr lam Galili leh chhim lamah Judai ram inkâr a awm a ni. Assuria hnuaia an sal tânna lama hnam dang neih pawlh ho an ni. Babulon saltânna aṭanga an lo kîr leh hnu a Jerusalem kulh Nehemia hovin an din pawh khan Samari mite puih an duh lo. Galili ram kal tûr pawh Samari kal tlang aiin kawng thui zâwk an hêl duh.

Isua leh a zirtîrte chuan Samari ram an kal tlang a, a zirtîrte pawhin Samari khua aṭangin eitûr an lei tlat mai! Isuan Jakoba tuichhunchhuah sîra Samari hmeichhia, nungchang ṭha lo lehnghal a bia pawh kha hriatthiam har tak tûr a ni. Isua hian a hun laia mite ngaihdân pêl rawkin mamawhte tân amah a inpe a ni. Isuaah mi tin an leng.

Aw hnam zawng zawng leh
Chi tin ṭawng tin hi,
Vân Lal nau ang a ṭahna Kalvari-ah,
An dang chuang lo ve.