THUPÊK ROPUI

MARKA 12:29-31
Isuan, “A ropui ber chu hei hi a ni: ‘Israel-hote u, ngai teh u, Lalpa kan Pathian chu Lalpa pakhat chauh a ni a; Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,’ tih hi. A dawttu chu hei hi a ni: ‘Nangmah i inhmangaih angin i vêngte pawh i hmangaih tûr a ni,’ tih hi. Hêng aia thupêk ropui zâwk rêng rêng hi a awm lo,” tiin a chhâng a.

Thupêk tia kan sawi ṭhin hi Mosia hmanga Israelte hnêna Pathianin dân leh thupêk an zawm tûr a pêkte kha a ni a. Dân leh thupêk a tam avângin lehkha ziaktu pakhat hian a ropui ber hriat a duh avângin Isua a zâwt a, Deut. 6:5 leh Lev. 19:18 thute hi thupêk ropui ber a nih thuin Isuan a chhâng a ni. Isua chhânna hi Thuthlung Thara mite tân pawh thupêk ropui ber leh thupêk ding reng a ni.

Hmangaih avânga a Fapa neih chhun min petu hian thinlung zawng zawng leh thlarau zawng zawnga hmangaih hi a phût a. Amah kan hmangaihna chu kan vêngte chungah lantîrin, mahni kan hmangaih anga vêngte hmangaih tûrin min phût a ni.