JOBA LEH TAWRHNA

JOBA 1:21-22
“Ka nu pum ata saruakin ka lo chhuak a, saruak vêkin ka kir leh dâwn a nih hi. Lalpan a pe a, Lalpan a la leh ta a; Lalpa hming chu fakin awm rawh se,” a ti a. Hêng zawng zawngah hian Joba chu a sual lo va, Pathian chu a mawhchhiat hek lo.

Chânna avâng te, hlawhchhamna avâng te, dam lohna avâng te leh thihna avâng te hian Pathian laka vui mai a awl hle ṭhin. Kan chhûngte dam lo, ṭhahnemngai taka kan ṭawngṭai chung pawha an thih thote hian Pathian dem maite leh a awm rin loh hialnate pawh neih mai a awl hle ṭhin.

Joba chuan a fate zawng zawng, a ran vulh zawng zawng leh a chhiahhlawhte zawng zawng a chân vek hnuah pawh, “Lalpa hming chu fakin awm rawh se,” a la ti thei a, Pathian a mawhchhiat lo bawk. Hêngte bâkah hian amah ngei pawhin a ke hnuai aṭanga a lu thlengin pânchhia a vei a, “Pathian hnên ata thil ṭha kan hmu a, thil ṭha lo pawh kan hmu lo vang em ni?” a la ti thei zâwk a ni (2:7-10). A va entawn tlâk em!