KE SIL NUN

JOHANA 13:14-15
Kei Lalpa leh Zirtîrtu mahin in ke ka sil chuan, nangni pawhin in ke in insilsak tûr a ni. In chunga ka tih ang hian nangni pawhin in tih vena tûrin ka tihhmuh che u a ni si a.

Kum 1994 chho vêlah khân China ramah khian Kohhran pâwl hnih inngeih lo tak tak an awm a. Kohhran lian zâwka an hruaitupa chuan inhmuhkhâwmna an neih ṭumin Kohhran pâwl lehlam (a tê zâwk)-a an hruaitupa chu a rin loh tak maiin, Lal Isua sawi ang khian, a kê a silsak ta a. Mittui nêna inkuahin inremna duhawm tak chu Kohhran pahnih inkârah chuan a lo awm ta a ni, an ti.

Kê hi lei kan rahna a nih avângin taksa bung hrang zîngah chuan a tenawm bera ngaih theih a ni a. Pheikhawka invawmte pawh inhmuhsitna tâwpa ngaih a ni. Hetiang a nih avâng tak hian ke insilsak hi tlâwmna nuna mi dang rawngbâwlsakna ropui ber a tling hial awm e. Kan Lal Isuan a zirtîrte kê a silsak kha, vawiina inrem lova awmte kârah pawh inremna a awm theih nâna entawn tûr min hnutchhiah a ni tih hria ila. Thu leh thil ṭha entawn tûr min lo hnutchhiah kha hman a ṭulna hmun apiangah i hmang ve ṭhin ang u.

Tlâwm ngam khawpa huaisente hi hnehna puanzar thing pharhtu an ni zêl zâwk ṭhin. Tlâwm ngam khawpin i huaisen ve thei ang em?