JUDA-TEN ISUA AN HNÂWL

JOHANA 10:25
Isuan an hnênah, “Ka hrilh tawh che u kha, in awih si lo; ka Pa hminga thil ka tih hi, hêng hian ka chanchin a hriattîr a nih hi,” tiin a chhâng a.

Inpumpêk Kût hi Juda-ho chuan ‘Hannukah‘ an ti. Antiochus Epiphanes-an Jerusalem temple-ah Zeus biakna dinin vawksa an hlan chu duh lovin nasa takin an dodal a. Temple thian faia an hlan thar lehna kût a ni. December thla tîrah ni riat lai an hmang ṭhîn. Juda-ten an in chu an tiêng sup sup ṭhin a, ‘Êng Kût – Festival of Light‘ an ti bawk.

Kût lai hian Isua man theih dân an zawng a. A hun a la thlen loh avângin tihhlum lohvin a chhuak a ni (Jn. 18:31). Isua chuan Krista, Messia a nih thu sawi mah se, Juda-ten an ring duh lo. Thilmak tam tak a ti chungin an hnâwl tho tho. Kan hria a, kan hmu chung hian Isua kan la hnâwl fo em?

Haw rawh, haw rawh,
Nangmah i hah ta, haw rawh;
Ṭhahnemngai takin Lal Isuan min ko va,
A ko che, mi sual, haw rawh.

Isua i hnâwl dâwn nge Chhandamtuah i pawm dâwn?