RUAHMANNA FEL NEIH

THUFINGTE 15:22; 20:18
Remruat lâwk lova thiltih chu a kal sual ṭhîn a, Remhria an tam erawh chuan a hlawhtling ṭhîn. Mi râwnin i thiltum chu bûk la, Fel taka rêlin hmêlma bei rawh.

Sipai râl bei tûrte pawhin ruahmanna fel tak an neih chuan an hmêlmate an hneh mai ṭhin a ni. Ruahmanna fel chuan hna a tisâwt a, hun pawh a heh lo bîk a ni. Hun hi a inzah ṭheuhvin Pathianin min pe a, ruahmanna fel tak nêna mahni hun hmang thiam apiangte an hlawhtling ṭhin. Tûk tin a tlachawpa hna thawh tûr dap chawp mi ai chuan ruahmanna fel tak neia kal ṭhinte hi an hlawhtling zâwk fo a ni.

Mahni maia ruahmanna fel neih a harsat pawhin mi dang râwn ṭhin a ṭha. Thluak khat thu aiin thluak hnih thu a fing nge nge ṭhin. Fate tui lam leh chem kalna lamte pawh thlîr thiam a ṭha hle bawk. Rawngbâwlna leh mahni eizawnna kawnga hmachhawp fel tak siam hi tha thlâwn sên lohna a ni a; hmalâk dân thlîrlêt fote pawh hi a ṭha, mi hlawhtlingte tih dân a ni.