A TIH THEIH TÂWK A TI

MARKA 14:8
A tih theih tâwk a ti a ni; ka taksa hi phûm tûrin a lo hnawih lâwk a nih hi.

Vawi khat chu Dr. Howard Kelley-a hi a ram chhuak a. A tum aia thui kea a kal avângin a chau hle a, a tui a hâl hle bawk. Farm pakhat hi a va pan chawt a, hmeichhe naupang pakhat hian a lo chhâwn a. Doctor chuan tui in tûr a dîl a, tui in tûr a neih loh avângin bâwnghnute a intîr ta zâwk a. Doctor tân chuan a tih theih tâwk a ti a ni.

Nakin deuhvah chuan chu hmeichhe naupang chu a damlo va, damdawi in an panpui a. Zai a ngaih avângin chêng tam tak bill an pêk a ngai a, an harsat avângin pêk tûr an nei si lo. Doctor chuan a en vang vang a, a hma deuh lawka bâwnghnute lo intîrtu kha a ni tih a hre chhuak a, “He hmeichhe naupang hian hmanni khân a tih theih tâwk a lo ti tawh a, kei pawhin a chungah ka tih theih tâwk ka tih ve a hun a ni,” tiin an bill-ah chuan, “Bâwnghnute no hnihin hêng bill zawng zawng hi a rûl zo vek tawh e,” tiin a ziahsak ta a ni.

Hmeichhe leplêrh takin Lal Isua tâna a tih theih tâwk hriak a thih kha Lal Isua tân a lawmawm a, a hlâwkna dawng tamtu zâwk chu hmeichhia a ni. Mite tâna kan tih theih tâwk kan tih hian vân malsâwmna a ko thla ṭhin a, mahni tân vêk hlâwkna a lo ni ṭhin a ni.