ENG MAH IN TI THEI SI LO

JOHANA 15:4
Keimahah awm reng rawh u, kei pawh nangmahniah ka awm reng ang. Pêng chu grêp hruia a awm reng loh chuan amahin a rah thei lo ang bawkin, nangni pawh keimaha in awm reng loh chuan in rah thei lo vang.

Thuthlung Hluiah chuan Israelte chu grêp hrui anga tehkhin an ni a, mahse grêp suak rah bawk si lo ang an ni (Is 5:1-7). Isua chu grêp hrui tak a ni, Amah ringtute chu grêp hrui pêngte kan ni. Grêp enkawltuin grêp pêng rah lo apiang a rah tam lehzual nân a hlâwi ṭhen ṭhin ang hian kan sual leh kan chîn dân ṭha lote hlâwi ṭhen a ngai.

Isua hnêna awm, a hnêna ṭawngṭai, a thu awih leh amah biak chu grêp hrui kan zawmna a ni. Amah kan zawm chuan engkim kan ti theiin Pathian kan chawimawi dâwn a lo ni (Phil 4:13).

Ka thlarauvin a zawm ta a,
Krista gerêp nung chu;
Rei tak ka lo thlahthlam ta a,
Mahse ka nei leh ta.

Krista zawm lovin eng mah kan ti thei lo.