AMAN MIN THLANG

JOHANA 15:16
Nangnin mi thlang lo, keiman ka thlang zâwk che u a, va rah tûr leh in rah awm reng tûrin ka ruat bawk a che u; ka hminga Pa hnêna in dîl apiang a pêkna tûr che uin.

Miin Isua zui an tum vâng ringawtin an zui kher lo. Min ko mah se kan zui duh leh duh loh chu keimahni thu a ni. Pathianin zalenna thiang tak duhthlan theihna remchâng min pe a ni. Zirtîrte mawhphurhna chu thuhretu nih leh rah neih a ni. Kristian zawng zawng pawh rah chhuah tûrin min ko. Ram dangah kan kal vek thei lo. Kan in chhûngah leh kan ṭhenawmah mawhphurhna kan nei vek.

Rah chhuah tûra kan thawh chuan Lalpan a khawngaihna leh chaknain min thuam ang, a thu kan awih chuan Thlarau Thianghlim min pe ang a (Jn 14:15-16), rah chhuah thei tûrin min pui dâwn a ni (Tirh 1:8).

A hnathawh chhunzawm zêl tûr tu nge awm?
Kei hi min thlang ta, ka Lal Isuan;
Lâwm chungin Lalpa rawng ka bâwl ang a,
Thih thlenga rinawm tûrin.

Isuan a thlang che a, i chhâng dâwn em?