NGHAH PEIH LOH PAWIZIA

1 SAMUELA 13:8-10
Samuelan ni a ruat angin ni sarih a awm a; nimahsela, Samuela chu Gilgal-ah chuan a la kal ta lo va; tichuan, mipuiin an tlân darhsan ta a. Tin, Saula chuan, “Hâlral thilhlan tûr leh remna thilhlan tûrte chu hetah ka hnênah han la rawh u,” a ti a. Chutichuan, hâlral thilhlan chu a hlân a. Tin, heti hi a ni a, hâlral thilhlan a hlân zo chauh va, Samuela chu a lo thleng ta a.

Lal Saula kum hnih a lal hnuah Samuelan Gilgal-a hâlral thilhlan a hlan tûr Saulan a lo hlan khalh a. Samuelan lal a nihna aṭanga hnâwl a nih tûr thu a hrilh ta a ni (1 Sam. 13:13,14). Helai thu aṭang hian Pathian hnathawh nghah peih loh a pawizia kan hmu thei a ni.

Israel faten Kanaan an panna kawngte kha han thlîr lêt chuan Pathian hnathawh an nghah peih loh avânga an chêt chhiatna hriat tûr a tam hle. Vawiina ringtu tam takte pawh kan la ni tho mai, Lalpa ti reng chungin mahniin kan bawh huam huam a, Pathian kut kan nghâk hman lo fo ṭhîn niin a lang. Ringtu intite zîngah pawh Pathian nghâk peih lo apiang an mualpho ṭhîn a, a nghâk peih apiang an lâwm ṭhîn a ni.