INRENCHEM 3-NA

THUFINGTE 24:6
Beih hmain ngun taka râl rêl a ṭha, Rem i hriat poh leh i chak zâwk ang.

Râl bei tûr tâna râl rêl thiam a ṭangkai angin inrenchemna thilah pawh ruahmanna siam thiam a finthlâk fo. Hmân deuhva kan khawsakna thila bet tel lo, changkânnain a ken tel, thla tina pêk ngai – electric bill te, tui bill te, mobile phone bill te, TV hman man te, chanchinbu man te, school fee te leh a dang te, khêl lova thla tin pawisa pêk ngai a tam ta a. Hêngte bâkah thla tin Pathian ram pêk a ṭûl a, khawn tesep dang a awm fo bawk a. Hetiang hi a nih avângin thla tina kan pêk chhuah ngai ang chi hi chu dah hran nghâl a ṭha khawp mai.

Tin, kan khawsak dân azira sum a ral tam loh theih dân chi hrang hrang a awm bawk – kan hman loh tûr electric switch off zêl te, inkawm nâna phone hman loh te, ei tâwka chaw chhum chîn te, in tâwka thingpui lum thiam te, chawhmeh kan nana sahriak a tâwk chauhva hman thiam te, tui hman thiam te hi a pawimawh êm êm a ni. Kan lâk luh mil tâwk zêla khawsak thiam hi zir a pawimawh hle a ni.