SIM ULA

TIRHKOHTE 2:38
Petera chuan an hnênah, “Sim ula, in sual ngaihdam nân Isua Krista hmingin baptisma chang ṭheuh rawh u; tichuan, Thlarau Thianghlim pêk hi in hmu ang,” a ti a.

Pentikos ni-ah Peteran Isua an khenbeha ngei kha Lal leh Krista a nihzia Thlarau Thianghlim thiltihtheihna nên a sawi a, an thinlung chu chhun ang a lo ni ta a, an tih tûr an zâwt ta ruai mai a ni.

Sim chu kan tih sual pawi tih a ni ringawt lo. Thupha chawia sual hawisan a ni. Sual ngaihdam nân baptisma chang tûrin a ti bawk. Miin tui thlawr emaw pil emaw a chan hi pâwn lam chhinchhiahna a ni e kan tih rualin khawvêl hmaah kan dinhmun kan pho lang a ni tih kan hriat a ṭha awm e. ‘Kraws puin Isua hnung ka zui e,’ tihna a ni. Isua thisen chauhvin sual a tlêng fai thei a, ‘Simin ka lo kal e, ka sualna ngaidam rawh’ i ti thei em?

Simna tel lo pianthar a tâwk lo ve,
Kraws thleng lova nun chânten
chhandam an hlawh si lo;
Sual haw lo mualpho hlau mai ringtu chu,
Tihboralin an la awm dâwn e.

Simin Isua i pan ang u.