UPA PASARIH THLAN

TIRHKOHTE 6:3-4
Chutichuan, unaute u, in zîngah Thlarau leh fina khat, mi hmingṭha hlîr pasarih thlang rawh u, anni chu hêng thil rêltu atân hian kan siam ang; keini erawh chu ṭawngṭai leh thu rawngbâwlin kan awm leh tlat zêl ang,” an ti a.

Kohhran ṭiak tîr kha ni tin an hnênah tel belh an awm ve reng a ni (Tirh 2:47). Setanan Kohhran ṭhangduang tak chu ṭhen hran tumin hma a la nghal a, an ni tin thil semah Hebrai ho chungah Grik-Judate an phunnawi nghal a ni.

Inrêlbâwlna hi inremloh tîr nan Setana hmanraw ṭha ber zînga mi a ni. Upa pasarih ni tin thil sem buaipuitu atân Thlarau leh finnaa khat, mi hmingṭha: Stephana, Philipa, Prokora, Nikanora, Timona, Parmena leh Nikola (Juda-te saphun) te an thlang ta a ni.

Kan chhûngkua leh kohhran ṭheuhah inrem taka Lalpa rawng kan bâwl ho nân theihtawpa fimkhurin ṭawngṭaina nên ṭan i la ang u.

Lungngaihna kan inṭâwm,
Rit phurh inchhâwk tawnin;
Kan tum, kan beisei a luang za,
Lâwmin kan lo khat hlawm.

Inrem lohna hi Setana hmanrua a ni.